Thursday, October 13, 2005

GRWP HYFFORDDI AMAETHYDDOL FFESTINIOG A’R CYLCH

Grwp Hyfforddi Amaethyddol Ffestiniog a’r Cylch
Yn ddiweddar wedi blynyddoedd o segurdod ail ddechreuwyd cynnal cyfarfodydd hyfforddi amaethyddol yn ardal Ffestiniog.

Arferai grwp o’r hen ATB fod yn y cylch (Agricultural Training Board), ond bellach mae hwnnw wedi diflannu. Fodd bynnag gan fod arian yn parhau yn y gronfa penderfynwyd ceisio cario ymlaen ar raddfa leol. Ers mis Ebrill mae dau gyfarfod eisioes wedi cael eu cynnal.

Cynhaliwyd y cyfarfod cyntaf yn Nhyddyn Merched. Daeth Mr Iwan Parry, un o filfeddygon Dolgellau draw i roi cwrs ar dynnu wyn. Daeth nifer o ieuenctid lleol at ei gilydd, a chafwyd hwyl yn dysgu ac yn cymdeithasu ar y noson. Roedd Mr Parry fel arfer yn gallu cael y gorau o ymateb y bobl ifanc, a phrofodd y cyfarfod i fod yn un effeithiol a difyr dros ben.

Yna yn ddiweddar aeth ychydig o’r bechgyn draw ar gwrs cneifio i Goleg Glynllifon ar fin nos. Buont yn dysgu sut i ddal dafad yn gywir, sut i ddefnyddio darn llaw y peiriant cneifio, cawsent gneifio dwy neu dair dafad bob un, a dysgu hefyd sut i lapio gwlân wedi ei gneifio. Roedd amynedd di ben draw gan yr hyfforddwyr, ac ni fuont fawr o dro yn dechrau cael trefn ar yr hogia’. Noson eto lle clywyd y criw ifanc yn dweud ar ei diwedd “Dwi wedi joio fy hun heno”.
Gobeithio y bydd dilyniant i’r ddau gwrs yma, ac y bydd cyrsiau ar bynciau eraill yn cael eu cynnal hefyd yn fuan.

Gobeithio yn fawr y gwelir parhad a dyfodol i grwp fel hwn. Mae o fudd mawr i bobl ifanc sydd a diddordeb nid yn unig mewn amaethyddiaeth ond hefyd ym mywyd cefn gwlad.

0 Comments:

Post a Comment

<< Home